Póñanse na situación: xoves, semana complicada -demasiado traballo, un par de noites seguidas sen durmir-, unha comida copiosa e, por diante, uns 300 quilómetros ao volante. Outra, por exemplo: luns de madrugada, de camiño á casa por unha estrada secundaria sen apenas iluminación e risco de animais na calzada. E unha máis: mércores, hora punta, atasco no centro da cidade, peóns sorteando os coches, chuvia, présas e o móbil soando sen parar; chamadas, mensaxes, onde estás.
Cansazo, falta de atención, estrés e distraccións. Non é novo que todos estes factores disparan o risco de sufrir un accidente de tráfico, pero si alarmante que sendo conscientes diso, as cifras de vítimas non descendan. Todo o contrario. Durante o 2017 producíronse 1067 accidentes mortais en vías interurbanas, deixando un saldo de 1200 persoas mortas; un 3% máis que o ano anterior, tanto en número de sinistros como no de vítimas.
¿E se a solución estivese na máquina? ¿E se o coche puidese alertar o condutor para que este frease, abrise os ollos, para que puidese corrixir a tempo a manobra? Niso atopa a startup galega Xesol Innovation, tecnolóxica de desenvolvemento de software máis que disposta a ter moito que ver na condución do futuro. De momento, xa desenvolveu un potente sistema de asistencia avanzada e acaba de quedar finalista do Premio Emprendedores e Seguridade Viaria da Fundación Vía Directa cunha das súas solucións intelixentes, un detector de fatiga.
Xesol, actualmente instalada en Tecnópole, naceu hai seis anos, cando José Nogueira -hoxe o seu director executivo- deuse conta do revelador que resultaría obter datos dos vehículos en tempo real. ¿Para que? Para mellorar a condución, pero tamén o mantemento do automóbil, e, sobre todo, para aumentar a seguridade viaria e reducir os niveis de contaminación.
Expansión internacional
O primeiro equipo, integrado por seis persoas, buscou un ecosistema óptimo para realizar as primeiras probas e, así, acabou instalándose no Parque Tecnolóxico de Galicia. Despois, abriu a súa sede central no centro de Vigo e logo saltou a Madrid. Comezaba a expansión. Hoxe, o seu equipo está integrada por uns 40 empregados -dous terzos deles, galegos-, conta con filiais en Hannover e en California, epicentro da condución autónoma, e estuda a súa implantación en China, onde xa está presente a través dunha consultora.
Parece que a cousa non lles vai mal. Teñen as ideas claras: no futuro, o transporte será intelixente. “Por suposto, a súa implementación non terá lugar de hoxe para mañá, pero si haberá un día no que todos os vehículos serán autónomos, pois a coexistencia co vehículo tradicional será esencialmente imposible porque as infraestruturas estarán acondicionadas unicamente para este tipo de condución”, manteñen.
¿Será capaz un ordenador de responder ante imprevistos? (O mes pasado un coche sen condutor atropelou mortalmente unha muller en Arizona que cruzaba a rúa por un sitio inesperado). “Hai que traballar moito aínda, aumentar o modelo dinámico de decisión, de xeración de distintas respostas, para minimizar este tipo de sucesos”, consideran.
Tres produtos estrela
En plena fase de comercialización e con clientes xa en carteira, Xesol prepara a revolución do coche autónomo a base de ferramentas orientadas a mellorar a experiencia ao volante e a salvagardar a vida do condutor. Tres das súas solucións máis prometedoras: Xesol Drive, Xentinel e Xesol SLAM.
A primeira -de momento, orientada só a fabricantes-, é un kit de software, cámaras e sensores que detecta, identifica, monitoriza e predí as traxectorias dos diferentes elementos da estrada. “Localiza peóns, ciclistas, coches; alerta de desviacións no carril, de colisións (tanto frontais como traseiras), recoñece os sinais e os semáforos, e advirte de saídas involuntarias de vía e carril “. -avanzan- “Actualmente, traballamos nunha variante destinada á industria 4.0 para axudar a condutores de vehículos industriais en ámbitos laborais”.
Do seu detector de fatiga, Xentitel, destacan como é capaz de facer saltar as alarmas: “Controla o comportamento do condutor, os seus bocexos, os seus pestanexos, mesmo se leva lentes de sol, e aprende os seus patróns”. A súa terceira ferramenta, en período de probas, xera mapas en tempo real e avisa sobre o estado das estradas. Para que nada nos pille desprevidos.
(Fonte: La Voz de Galicia)