As empresas españolas claman no deserto por un maná de talento que non acaba de chegar. O informe “Radiografía das vacantes no sector tecnolóxico”, realizado pola Asociación Española para a Dixitalización (DigitalES), pon cifras concretas a unha seca pertinaz e crecente: o mercado laboral español acumulaba a mediados de maio 120.400 vacantes en actividades tecnolóxicas. Un emprego de calidade e ben remunerado (37.660 euros ao ano, 11.000 por enriba da media nacional) que se perde no baleiro.
Soamente tres sectores acumulan case 90.000 postos sen cubrir: Desenvolvemento de software (40.000), Sistemas, hardware e CPDs (25.000) e Ciberseguridade (24.000). Pero como advirte o informe, o mal esténdese rapidamente e medra a demanda sen resposta de perfís cada vez máis hiperespecializados.
«Paradoxalmente, as vacantes máis difíciles de cubrir son as máis especializadas e, por tanto, mellor remuneradas. Falamos de perfís de desenvolvemento “frontend” e “backend”, de científicos de datos, arquitectos cloud…», explica Javier Miranda, responsable de Formación e Emprego de DigitalES, e coautor do estudo.
O informe insta a aproveitar a ocasión dos fondos europeos para «impulsar unha formación de calidade en novas competencias e cualificacións». «Sen ningunha dúbida, ofrecen contías suficientes para cubrir a formación que require o talento que demanda este sector. Pero non se trata só dunha cuestión de recursos. Para que as políticas públicas en educación e emprego sexan eficaces necesitan coordinación, flexibilidade e axilidade», precisa Miranda.
O coautor do informe defende tamén que intensificar a conexión entre as universidades e o sector privado «é fundamental» para selar esta fenda crecente. Nese proceso, «as institucións educativas deben reforzar a colaboración público-privada, pór en marcha un modelo máis intensivo de horas de prácticas, desenvolver os perfís profesionais prioritarios para facer fronte ao aluvión de investimentos tecnolóxicos e establecer un modelo atractivo de carreira profesional», detalla.
Fonte: ABC