Hannah Carvajal Seidel, alumna de cuarto curso de Primaria do Colexio Plurilingüe Santa María de Ourense (Maristas), é a gañadora do concurso para deseñar a camiseta oficial de Galiciencia 2026. Baixo o título “Picaches”, o seu debuxo amosa varios peixes rodeados de anzois, que simbolizan algúns dos riscos e perigos aos que estamos sometidos no noso día a día na contorna dixital: as fake news, a información bancaria, as redes sociais, os nosos datos persoais… Un xurado de expertos decidiu a proposta gañadora, da que se valorou a súa creatividade e a conexión coa temática desta edición da feira, a “Ciberseguridade”.
Ao certame presentáronse un total de 300 debuxos procedentes de 15 centros educativos de Primaria de toda a comunidade. A rapaza premiada recibirá camisetas para toda a súa clase, con exemplares tamén para os seus profesores e familiares. Así mesmo, distribuiranse camisetas entre o persoal da organización de Galiciencia e entre o alumnado que presente os seus proxectos na feira.