Trátase dunha solución froito de máis de 10 anos de investigación conxunta entre ITG e os seus socios italianos vinculados ao principal xestor de auga da rexión da Toscana.
WETNET é unha tecnoloxía de inserción baseada nun innovador sensor de fluxo incorporado en canalizacións de presión, e nun sistema de supervisión que permite mellorar a capacidade de control nas redes de distribución de auga. Deseñado para proporcionar datos precisos e en tempo real que permitan tomar decisións baseadas en evidencias sólidas, resolve problemáticas concretas que afectan tanto a grandes operadores como a servizos municipais dun tamaño máis reducido. Non é necesaria a interrupción do servizo e proporciona un elevado nivel de control sobre a rede que doutro modo tería un custo inasumible.
Permite, por exemplo, que o servizo non sexa interrompido durante a súa instalación, reduce os custos de implantación ao evitar a adaptación das conducións e ten un reducido mantemento durante a súa vida útil, sendo doadamente substituíble sen necesidade de persoal especializado. O número de puntos de medida é doadamente escalable e pode convivir con sistemas de control de medición pre existentes, incluídas as infraestruturas de comunicación.
Ademais, os servizos de supervisión e control de WETNET tamén permiten unha ampla gama de opcións na elaboración de datos e a súa presentación (dende simples avisos a simulacións e previsións) para apoiar as decisións. Tanto o medidor de fluxo, o subsistema de comunicación (RTU e de rede) e o software de supervisión, responden ás esixencias do mercado e satisfán os requisitos de certificación European Technology Verification (ETV).
WETNET recibiu dúas mencións de honra, nas categorías de innovación e tecnoloxía, durante a celebración de WEX Global 2016. Celebrado na cidade de Lisboa o pasado mes de febreiro, trátase do encontro de negocios de referencia a nivel mundial entre os profesionais e organizacións especializadas no ámbito da auga e a enerxía.
(Fonte: Innovamás)