Estas compañías investiron en 2016 un total de 2539 millóns de dólares (2329 millóns de euros), segundo se aprecia no informe ‘2016 Global Innovation 1000’, elaborado pola consultora de estratexia de PwC.
O estudo mostra que, entre 2015 e 2016, o investimento en I+D das 1000 empresas que máis dedican a innovación no mundo foi de 680.000 millóns de dólares (629.630 millóns de euros).
No máis alto da clasificación das empresas máis innovadoras figuran corporacións do talle de Volkswagen, Samsung, Amazon, Google e Intel.
O informe constata que a forma na que invisten en innovación as maiores empresas do mundo está a cambiar. Se tradicionalmente dedicaban gran parte do seu presuposto en I+D á mellora dos seus produtos físicos, durante os próximos anos van centrar a maioría do seu esforzo no desenvolvemento de software e de novos servizos.
En 2020, o investimento en innovación en produtos físicos só suporá o 37% do investimento total en I+D, cando en 2010 a porcentaxe era do 46%, mentres que a destinada ao desenvolvemento de software e servizos crecerá ata o 63%.
As grandes compañías norteamericanas son as que están liderando esta transformación, ata o punto de que, das 1000 compañías analizadas, 381 son norteamericanas, 33 máis que na edición de ano pasado, mentres que as europeas caen de 244 a 223.
Con este cambio de estratexia, as empresas buscan seguir sendo competitivas, aumentar os seus ingresos, cumprir coas expectativas dos clientes e aumentar as súas marxes.
O cambio de rumbo dos investimentos en innovación está a provocar tamén un cambio nos perfís profesionais que van demandar as empresas.
Espera que, en 2020, o número de empresas que consideran os enxeñeiros electrónicos como a súa principal prioridade á hora de contratar, caia un 35%, mentres que aumentará do 8% ao 16% as compañías nas que o colectivo de enxeñeiros de datos sexa o máis importante.
Os ingresos das empresas que máis investiron a nivel mundial en I+D caen case un 12% en 2016, arrastrados polas empresas de enerxía e química e o forte descenso do prezo do petróleo.
(Fonte: EP)