Tecnópole e CHUO inician unha nova liña de colaboración para a formación de facultativos no Centro de Tecnoloxías Cirúrxicas Minimamente Invasivas

Parque Tecnolóxico de Galicia e Hospital Universitario de Ourense (CHUO) inician unha nova liña de colaboración que permitirá desenvolver unha programación continuada de formación biomédica avanzada, con sede no Centro de Novas Tecnoloxías Cirúrxicas Minimamente Invasivas (Tecmeva) situado na Tecnópole.
 
A nova estratexia de colaboración foi presentada esta tarde, nunha sesión informativa á que asistiron facultativos, formadores e investigadores das áreas de ciencias da saúde  e que contou coa presenza da xerente da Axencia de Coñecemento en Saúde (ACIS), Beatriz Allegue. Todos eles tiveron a oportunidade de coñecer as instalacións a pleno rendemento, coincidindo coa celebración, por vez primeira en Tecmeva, do prestixioso Curso de ATLS (Advanced Trauma Life Support) de atención inicial ao enfermo politraumatizado do Colexio Americano de Cirurxáns (ACS), que se vén celebrando ininterrompidamente en Ourense desde 2009.
 
Establécese así un marco estable de continuidade para centralizar e promover accións formativas nestas instalacións, trazando unha folla de ruta que permita posicionar Ourense como referente na formación biomédica da Área Sanitaria Sur, nos campos da simulación, a microcirurxía e a laparoscopia. Isto é posible grazas á dispoñibilidade na Tecnópole de equipamento avanzado e á experiencia dos cadros de persoal cirúrxico e médico do CHUO.
 
Ambos centros manteñen desde hai anos contactos, que se plasmaron en accións previas en Tecmeva, como o curso de técnicas avanzadas de cirurxía laparoscópica, celebrado o pasado ano para especialistas en xinecoloxía.
 
Equipamento avanzado e traxectoria docente
 
Tecmeva conta con salas para formación práctica en laparoscopia en tres dimensións, fetoscopias, e outras técnicas cirúrxicas mínimamente invasivas; catro postos para formación en técnicas laparoscópicas convencionais; unha unidade de simulación virtual para adquirir habilidades no manexo de instrumentos e técnicas; e unha sala de vídeoconferencias, que permite plena conectividade.
 
Tendo en conta o seu equipamento e instalacións, poderá acoller cursos básicos e avanzados  en técnicas minimamente invasivas ou laparoscópicas en todas as áreas de cirurxía xeral e aparello dixestivo, de mama, abdominal, colo-protolóxica, endocrina, etc.
 
Intereses comúns e colaboración
 
Tal e como expuxo o director xerente de Tecnópole, Ricardo Capilla, durante súa intervención, Tecmeva converteuse xa nun espazo de referencia para actividades de formación en técnica laparoscópica. Capilla lembrou que, desde a súa posta en marcha en 2010, “especialistas en xinecoloxía e obstetricia de hospitais públicos das catro provincias pasaron xa por aquí para adestrarse nestas técnicas, minimamente invasivas e máis seguras e eficaces”, ao que engadiu que as instalacións están a disposición de todos os centros e facultativos do Servizo Galego de Saúde para a súa formación e entrenamento.
 
Ademais, o xerente de Tecnópole destacou que Tecmeva foi tamén a instalación central do proxecto QUIRAV, apoiado polo programa FEDER-Innterconecta da Consellería de Economía, Emprego e Industria para desenvolver o quirófano do futuro, un sistema avanzado que contribuirá á mellora nas condicións de seguridade, eficiencia e calidade da actividade cirúrxica.
 
Pola súa parte, o responsable da Xerencia de Xestión Avanzada de Ourense, Julio García Comesaña, destacou a oportunidade poder poñer a disposición dos profesionais de Ourense unhas instalacións sen igual en toda a Área Sur e subliñou o papel innovador e docente do equipo profesional de Ourense, asi como a experiencia acumulada, ao longo dos últimos vinte anos, desde o Laboratorio de Microcirurxía Experimental.