Smartcity, a cidade intelixente

Aínda que o concepto nos recorde ao guión dunha película de ciencia ficción, as cidades tamén poden ser intelixentes. E non se trata dunha profecía futurista, todo o contrario, pois xa é unha realidade con nome propio en Málaga. Trátase de Smartcity, un proxecto pioneiro no noso país liderado pola eléctrica Endesa que formula un novo modelo de xestión enerxética nas cidades baseado no desenvolvemento sustentable e a eficiencia da man das novas tecnoloxías e coa participación directa do cidadán.

 

Situado na área da malagueña Praia da Misericordia, o obxectivo desta experiencia é conseguir cifras tan positivas como un aforro enerxético do 20%, unha redución das emisións de 6000 toneladas de dióxido de carbono (CO2) ao ano e un aumento do consumo de enerxías renovables.

 

Lograr tan ambiciosas aspiracións pasa por utilizar dunha forma máis óptima os recursos enerxéticos e fomentar o uso racional da enerxía; pero a racionalidade aumenta a necesidade de control, de supervisión e de integración de todos os elementos en xogo. Para levar á práctica a tarefa de coordinar todas as pezas que forman o puzle, Smartcity acaba de inaugurar o seu centro de control e monitorización, unha sala de case 200 metros cadrados dende a que se verifican todos os parámetros do proxecto.

 

"Dende aquí comprobamos en tempo real as variables críticas e relevantes de Smartcity, como son os consumos dos clientes, o estado da rede de media e baixa tensión, os indicadores enerxéticos e de emisións de CO2, etcétera. Isto permítenos adecuar as medidas de control ás necesidades dos clientes da zona", explica Jorge Sánchez Cifuentes, director do Programa do Vehículo Eléctrico de Endesa.

 

 

Pero o novo centro de control ten outro labor divulgativo que resulta clave para conseguir que o modelo de cidade intelixente desenvolvido en Málaga poida exportase a outras capitais españolas nun futuro non moi afastado. "O centro montouse cunha clara visión pedagóxica que nos permitirá difundir e ensinar os resultados. Así, axudaremos a crear a conciencia nos cidadáns da importancia que ten o cliente nos retos enerxéticos nos que estamos inmersos", aclara Sánchez Cifuentes. En concreto, o centro está dividido en zonas temáticas e conta con pantallas que explican aos viandantes de forma sinxela o funcionamento de cada unha das tecnoloxías que fan posible Smartcity.

 

A mobilidade eléctrica é outro dos ingredientes clave do éxito da cidade intelixente. Por iso, Endesa e Mitsubishi lideran en Málaga o proxecto Zem4all, unha iniciativa que contempla a introdución dunha frota duns 200 vehículos eléctricos, arredor dos cales se integrarán 220 puntos de recarga normal e outros 16 puntos de recarga rápida, así como sistemas de optimización da rede de distribución enerxética e de interacción co usuario. "Smartcity presenta un ámbito vivo de proba e mellora no que non podían faltar os vehículos eléctricos. Os primeiros coches comezarán a chegar este outono, xa que antes é necesario realizar fases previas, como a selección dos participantes ou a creación de infraestruturas óptimas de carga", puntualiza Sánchez Cifuentes.

 

 

Aínda que o proxecto apenas acaba de arrancar (aínda quedan por diante catro anos de vida e experimentación), 300 clientes industriais, 900 de servizos e 11.000 usuarios domésticos xa se benefician dos privilexios de habitar nunha denominada cidade intelixente.

 

"Os cidadáns poden conseguir dúas vantaxes claras respecto a unha cidade habitual. A primeira é coñecer con máis detalle os seus consumos enerxéticos, sabendo por exemplo a que hora teñen o seu maior pico de consumo e como se produce. Así, a segunda delas é a optimización da factura enerxética, xa que ao coñecer o seu consumo, o usuario pode actuar en consecuencia, variando o seu comportamento ou aproveitando mellor o seu contrato para gastar cando é máis barato, con opcións como a tarifa nocturna,", explica Sánchez Cifuentes. Así, no futuro non haberá que esperar un ou dous meses para saber canta enerxía gastamos, abondará conectarse a Internet para coñecer o consumo case ao instante. "As tecnoloxías que se están a instalar, como os contadores de telexestión, permitirán ter clientes informados, sensibilizados co seu consumo e, polo tanto, responsables das súas emisións,", engade o responsable de Endesa.

 

Se nos fogares o contador intelixente é o gran protagonista deste proxecto, na rúa prima a integración óptima das fontes renovables na rede eléctrica. En concreto, está prevista a instalación de paneis fotovoltaicos en edificios públicos, o uso de microxeración eléctrica en hoteis, como o Vincci Málaga, ou o desenvolvemento de sistemas microeólicos na zona.

 

Entre outras accións, en setembro comezará a instalación de 28 luminarias con xeración renovable, minieólica e fotovoltaica sobre os propios farois do paseo marítimo. Ademais, utilizaranse tamén sistemas de almacenamento enerxético en baterías para facilitar o seu consumo posterior na climatización de edificios, a iluminación pública e o transporte eléctrico. "Aínda que aínda é pronto para falar de resultados, imos no bo camiño. Málaga será un referente mundial", apunta Sánchez Cifuentes.

 

(Fonte: La Razón)