MULTI é o primeiro ascensor do mundo capaz de trasladarse tanto en horizontal como en vertical, o que posibilitaría tomar novas direccións de desprazamento nos “hubs” (centros de conexión) de transporte subterráneo e incrementaría a capacidade dos pasaxeiros nun 50%. Na reunión, os profesionais debateron os retos que afrontan as estacións de metro en canto a mobilidade e eficiencia, debido á urbanización e o crecemento demográfico das cidades.
No caso de Londres, a poboación crece a un ritmo do 1,5% cada ano, rozando en 2015 os 8,6 millóns de persoas, polo que se fai esencial aplicar novas tecnoloxías nos “hubs” de transporte, co fin de trasladar os pasaxeiros do xeito máis eficaz posible. Segundo Thyssenkrupp, “a medida que evoluciona o estilo de vida das persoas e os pasaxeiros tratan de lograr un maior equilibrio entre traballo e vida diaria, os hubs de transporte convértense en puntos retail (venda polo miúdo) e de restauración; lugares onde a xente quere pasar o tempo, en vez de tomalos como zonas de paso”.
En Londres, as estacións de Waterloo -a máis concorrida da cidade con 95 millóns de pasaxeiros anuais- e King ‘ s Cross, son un exemplo de “hubs” convertidos en centros de actividade. Os expertos debateron opcións para redeseñar estas estacións co fin de lograr unha adaptación ás necesidades do viaxeiro actual, onde o tempo e a comodidade son os obxectivos prioritarios. Segundo Chris Williamson, cofundador e socio da firma de arquitectura Weston Williamson + Partners, “o soterramento orixinal de liñas de tren era absolutamente revolucionario para o seu tempo”. Non obstante, ao aumentar a demanda de pasaxeiros, a situación subterránea destas liñas dificulta a súa actualización, comentou.
Williams sinalou que para a maioría dos pasaxeiros “é igual de importante acceder de forma rápida e cómoda á plataforma como o é a rapidez do propio metro”, polo que a tecnoloxía MULTI “ten o potencial para redefinir a infraestrutura existente e abrir niveis de acceso sen precedentes entre plataformas e ao exterior”. Esta clase de innovación é, segundo el, “clave” para o futuro deseño da cidade pois “podería proporcionar unha solución aos problemas de mobilidade ao que se enfrontan as redes subterráneas”.
Pola súa banda, Andreas Schierenbeck, conselleiro delegado de ThyssenKrupp, destacou que a aplicación do sistema MULTI “axudaría a transformar a rede de transporte de Londres e a reforzar a posición do Reino Unido á cabeza das innovacións globais”. “Ademais, tamén ofrece unha solución práctica que podería aliviar a conxestión nas redes de transporte subterráneo de todo o mundo”, agregou.
(Fonte: Ideas e Inventos)