Primeiro centro demostrador TIC de loxística en España

España inaugurou o primeiro Centro Demostrador de Tecnoloxías da Información e as Comunicacións para o Sector de Loxística, nas instalacións do Instituto Tecnolóxico de Aragón (ITA), en Zaragoza. Este centro, único en España, quere ensinar para que poden servir as TIC a aquelas empresas dedicadas á loxística ou que teñen un departamento de loxística.

Para conseguir este obxectivo, construíuse un espazo á medida cun equipamento singular que se elaborou a partir das necesidades que teñen as empresas loxísticas. Deste modo, demóstrase de forma práctica como a tecnoloxía permite resolver problemas reais. A iniciativa, froito do convenio entre a entidade pública Red.es e o ITA, compleméntase con centros de formación como o Zaragoza Logistics Center.

O centro, proxecto iniciado en 2008, dispón dunha superficie de 453 metros cadrados, nos que se habilitaron catro espazos para mellorar a cadea de subministración, almacén intelixente, transporte intelixente e punto de venda intelixente. O almacén intelixente conta cun arco de lectura automática de mercadorías, estantes que xestionan o stock mediante sensores, unha instalación automatizada parametrizable que inclúe os sistemas máis avanzados en identificación, monitorización e tracking, e varios sistemas para mellorar a preparación manual de pedidos. O espazo destinado a transporte intelixente inclúe un software de simulación de tráfico para optimizar a mobilidade dos cidadáns e a distribución urbana de mercadorías.

Por último, o punto de venda intelixente dispón dun estante intelixente para o control automático do inventario, que permite coñecer a tempo real o stock de produtos dispoñibles no lineal de venda e repoñelos en función da demanda.

(Fonte: SpainTechnology)