Un grupo de investigadores do MIT, liderado polas profesoras Angela Belcher e Paula T. Hammond (e avalado pola empresa enerxética italiana Eni a través da MIT Energy Initiative), describiu recentemente na revista Energy & Environmental Science o proceso que desenvolveron para reciclar materiais presentes en baterías de coches desbotadas (altamente contaminantes, a causa do chumbo que incorporan) en resistentes paneis solares capaces de subministrar enerxía libre de emisións.
O devandito sistema, baseado no uso dun composto chamado perovskita de haluro de chumbo, foi notablemente mellorado dende os experimentos iniciais de 2012, e as células fotovoltaicas baseadas na perovskita xa logran unha eficiencia de conversión de enerxía de máis do 19%, logrando así ser case tan competitivas como as células solares comerciais baseadas en silicio.
Aínda que nun principio a presenza de chumbo neste composto se considerou un inconveniente, valorouse o feito de poder desviar un material destinado a contaminar en vertedoiros á produción de enerxía limpa: unha das principais razóns para centrar agora a atención na reciclaxe das vellas baterías de coches é o feito de que a irrupción no mercado das novas baterías de ións de litio ameaza con romper en breve a cadea de reutilización do chumbo para a construción de novas baterías de chumbo-ácido, por quedar estas obsoletas. Agora, esta investigación do MIT será de grande utilidade para dar un uso sustentable a eses residuos.
Agora que se conseguiu converter a perovskita nunha película de só medio micrómetro de espesor, sabemos que unha única batería de coche podería producir paneis solares suficientes para subministrar enerxía a 30 fogares. Nun panel solar rematado, a dita capa de chumbo quedaría totalmente encapsulada entre outros materiais, limitando así o risco de contaminación do medio ambiente. Cando os paneis deban ser retirados, a capa de perovskita poderá ser reutilizada aínda varias veces. Ademais, ao ser un material procesable a baixas temperaturas, a produción de células solares require menos tempo e custo que a baseada en silicio, polo que resulta doado de producir a grande escala. O aforro é aínda maior se pensamos que libera da necesidade de investir na busca e extracción de novas fontes de chumbo.
(Fonte: Agencias)