Durante o primeiro semestre de 2022, a contratación media de perfís TIC superou o 7,4%, moi por enriba da media do sector servizos en España, que se sitúa no 4,9%. Estes datos, extraídos da última entrega do barómetro mensual TIC Monitor -elaborado por Vass e o Centro de Predición Económica Ceprede- confirma que o dinamismo do emprego neste ámbito mantense ao mesmo ritmo que en 2021: o sector de servizos relacionados coa informática foi o terceiro en creación de emprego a escala nacional, con 73.000 novos ocupados.
Antonio Rueda, director de Vass Research e responsable de Tic Monitor, sinala que “aínda que o mercado laboral estea empezando a amosar signos de fatiga ante a posibilidade dun parón da economía, non é o caso deste sector. Se se segue a este ritmo, podería bater unha marca histórica superando as 100.000 contratacións en 2022”.
Un sector en auxe
As cifras de actividade avalan esta tendencia de crecemento. A facturación nas empresas de servizos de programación, consultoría e outras actividades relacionadas coa informática rexistrou un crecemento interanual do 19,6% entre xuño de 2021 e xuño de 2022. “O crecemento medio no que vai de ano mantense nun 18 %”, apunta Rueda.
En canto ás expectativas de creación de novo emprego, o indicador de clima sobe lixeiramente desde os 32,7 puntos até os 40,7. Isto significa que o 70,4% das empresas de servizos dixitais confía nunha creación de emprego neto entre setembro e novembro, fronte ao 29,7% que percibe un axuste de persoal.
Respecto da actividade, aínda que baixa lixeiramente o optimismo, volve ser maior que na media da Unión Europea (27,2). O indicador de clima de negocio pasa dos 48,8 puntos do mes pasado a 43. Supón que o balance entre os que esperan un crecemento da actividade até novembro e os que temen unha contracción, inclínase a favor dos primeiros nun 71,5% dos casos.
Fuga de talento
No entanto, o incremento na demanda destes profesionais non frea a fuga de talento. Segundo Comisións Obreiras, a oferta de emprego para posicións tech en España representa o 22,7%, pero o sector do Tic experimentou unha fuga de até 100.000 profesionais desde 2008. Por outro lado, a Asociación de Empresas Tecnolóxicas Dixitais afirma que o noso país ten actualmente máis de 120.000 vacantes tecnolóxicas sen cubrir; e o INE reflicte que o 47% das empresas que require estes perfís tivo problemas para cubrir esas vacantes.
Fonte: Expansión