Parque Tecnolóxico de Galicia-Tecnópole abre o prazo de recepción de proxectos para a Galiciencia 2020 ata o próximo 15 de marzo. A maior feira científica de Galicia terá lugar os días 6, 7 e 8 de maio, coa innovación do futuro como temática central.
Coa apertura da recepción de propostas iníciase o proceso de selección dos 80 proxectos cos que Tecnópole celebrará a décima edición deste evento. Aos 50 traballos presentados por equipos de estudantes de Secundaria, Bacharelato e FP que competirán polo primeiro premio do certame, sumaranse fóra de concurso 30 proxectos máis de alumnos de Primaria e Educación Especial.
O evento terá lugar nas instalacións do Parque Tecnolóxico de Galicia, no concello ourensán de San Cibrao das Viñas. A súa celebración é posible un ano máis grazas ao apoio da Consellería de Economía, Emprego e Industria, a través da Axencia Galega de Innovación (Gain).
As bases están xa dispoñibles en www.galiciencia.com, coa posibilidade de que calquera centro escolar envíe as súas propostas. Os 50 proxectos participantes na competición estarán expostos durante os tres días da feira, mentres que os de Primaria e Educación Especial poderán verse en quendas de 10 proxectos diferentes cada día. Tamén está aberta na web a recollida de solicitudes de visita para grupos por parte dos centros escolares.
Como principal novidade nesta edición, en consonancia coa temática deste ano e coa actividade de Tecnópole de promoción do STEM feminino, o premio especial da Galiciencia 2020 será para o mellor proxecto liderado por unha estudante ou para o mellor traballo relacionado co fomento da igualdade de xénero no ámbito da I+D+i.
Co obxectivo de garantir o acceso a unha representación diversa dos centros de toda Galicia no certame, limítase a tres proxectos a exposición por cada centro. Para participar, o requisito fundamental é formar un equipo de dous alumnos e un profesor e contar a idea, xa sexa un proxecto experimental e tecnolóxico ou un traballo documental, a través do formulario de inscrición.
Os equipos seleccionados para expoñer o seu proxecto deberán achegar previamente unha presentación dixital na que se recollan os aspectos máis relevantes da súa investigación, co obxectivo de fomentar a capacidade para resumir e comunicar de forma atractiva o seu traballo de cara á celebración da feira.
Á parte de montar a infraestrutura da feira e facilitar o desprazamento e a estancia dos participantes en Ourense, Tecnópole organiza actividades paralelas para eles e para os visitantes. Este ano haberá, entre outros, varios talleres relacionados cos retos científicos e de innovación que presenta o futuro e coas tecnoloxías que están chamadas a resolvelos.
Ademais, lanzouse tamén o desafío “Atrévete coa innovación do futuro!”, que terá varias probas eliminatorias online ao longo dos próximos meses e que resolverá a súa fase final, de carácter presencial, durante a Galiciencia. Á súa vez, quedan convocados os concursos de fotografía para alumnos e profesores e de deseño da camiseta oficial do evento.
Toda a información www.galiciencia.com.
(Fonte: Tecnópole)