O informe resalta que a innovación é a “mellor panca de crecemento”, xa que permite xerar máis volume e valor, non obstante, en España o pasado ano tan só se lanzaron 128 innovacións en produtos de gran consumo, un descenso que encadea sete anos. O documento reflicte que entre as innovacións máis exitosas de 2013, as tres primeiras de cada sector son marcas de fabricantes e corresponden a grandes multinacionais estranxeiras.
Desta forma, España atópase “á cola” de Europa en lanzamentos na comparativa co resto de países europeos. “En España, tan só o 9% das referencias que atopamos nos nosos supermercados e hipermercados son novos, o que supón o dato máis baixo de Europa,”, indicou César Velencoso, voceiro da consultora.
O estudo reflicte que aquelas categorías onde as cadeas referencian máis a innovación das marcas de fabricante, estas crecen un 3,7%, mentres que nas categorías onde este apoio é escaso, o consumo só aumenta un 0,9%. “A innovación é imprescindible na etapa post crise porque se non se actúa o mercado non crecerá. Ten un papel fundamental porque fai crecer os mercados e tamén as categorías, dálles valor e revalorízaas”, insistiu.
Velencoso explicou que, entre as razóns polas que en España non se innove, destacan o baixo grao de novidade dos produtos, o pouco apoio ao investimento e o acceso á innovación, xa que dous de cada tres lanzamentos descóbrese no punto de venda.
Así mesmo, o informe destaca que o esforzo innovador realizado polas marcas de fabricante segue sen ter o suficiente apoio por parte dalgunhas cadeas líderes de distribución, o que contribúe de xeito esencial á falta de crecemento nas categorías, ao que hai que engadir o efecto negativo sobre a variedade e a capacidade de elección dos consumidores, e o seu acceso aos produtos máis novidosos.
Pola súa banda, o presidente de promarca, Ignacio Larracoechea, recalcou que a “innovación se atopa baixo mínimos”. “É fundamental incrementar a distribución porque a maior parte dos produtos novos non chegan a estar dispoñibles nos establecementos dos consumidores”, recalcou.
“A innovación non chega ao consumidor pola política dalgunhas cadeas e hai veces que é o que é bo para unha empresa non é bo para o consumidor”, destacou, sobre o comportamento que teñen algunhas cadeas de distribución, que non apoian ese esforzo innovador.
Por iso, dende promarca fixeron un “chamamento ao Goberno e ao Ministerio de Economía e ao de Agricultura, Alimentación e Medio para crear un Observatorio da Innovación que tivese como fin avaliar e analizar o funcionamento do mercado e ditar as medidas necesarias para favorecer a innovación”. “Así dariamos a volta á situación de falta de crecemento sustentable e crearíase valor económico e emprego”, recalcou Larracoechea.
(Fonte: Innovamás)