O programa Ignicia facilitará o acceso ao mercado de 30 proxectos galegos de investigación

A Xunta de Galicia abriu a convocatoria do programa Ignicia, cuxo obxectivo é facilitar o acceso ao mercado de, aproximadamente, 30 proxectos de investigadores galegos, xerar novas empresas e patentes e impulsar a creación de emprego de alta cualificación. Esta primeira convocatoria conta cun presuposto inicial de 5,5 millóns de euros ata finais de 2018.

Desenvolvido pola Axencia Galega de Innovación (GAIN), contará co apoio da Fundación Barrié, que lle transferirá a metodoloxía e experiencia do seu Fondo de Ciencia, co que conseguiu crear dúas spin offs e dous proxectos cuxos resultados se atopan en proceso de comercializacion. A Fundación participará na avaliación dos proxectos presentados e organizará accións de formación dirixidas ao persoal de GAIN e demais axentes do Sistema Galego de Innovación.

Ignicia apoiará proxectos que permitan validar unha tecnoloxía en condicións reais ou cuasi reais, promovidos por un organismo público ou privado de investigación con sede en Galicia, como as universidades do sistema universitario galego, os centros en Galicia do CSIC, os centros en Galicia do Instituto Español de Oceanografía, as fundacións de investigación sanitaria de Galicia e os centros tecnolóxicos e de apoio á innovación tecnolóxica.

Os proxectos presentados deberán ter a capacidade de xerar resultados con aplicación na sociedade, contando con potencial comercial e xerar retornos económicos, independentemente do prazo no que estes retornos se produzan.

Os proxectos serán seleccionados con base en criterios centrados, entre outros factores, no grao de innovación da solución proposta, o potencial para xerar retornos económicos, e o compromiso do grupo de investigación coa comercialización dos seus resultados. A partir de aquí, a Xunta de Galicia apoiará os promotores na posta en marcha dunha nova empresa en forma de spin off, ou na cesión do dereito de explotación da patente por parte doutra empresa.

(Fonte: Innovamás)