O programa Kit Dixital, para financiar a dixitalización empresarial en España coas axudas europeas, repartiu no seu primeiro ano en marcha uns 950 millóns de euros entre as pemes, o que supón preto dun terzo do seu orzamento total. Os datos de Red.es indican que en total se repartiron xa 183.000 bonos dixitais entre empresas de até 50 empregados.
A dotación total do programa é de 3.067 millóns de euros, procedentes dos fondos de recuperación comunitarios, e o Goberno anunciou que ampliará durante todo 2024 o prazo para solicitar as axudas.
En canto ás finalidades máis habituais das axudas solicitadas, as empresas de 10 a 50 traballadores buscan maioritariamente sufragar solucións informáticas para a xestión de procesos e o business intelligence, mentres que as firmas de menor tamaño buscan principalmente solucións dixitais que lles axuden a darse a coñecer, financiando o desenvolvemento dunha páxina web ou a xestión das súas redes sociais.
Para que as empresas poidan alcanzar estes fitos, nestes intres hai preto de 10.200 axentes dixitalizadores dados de alta, dos que o 98% son pequenas empresas TIC e o 66% xa asinaron contratos con beneficiarios. Así mesmo, o 100% das empresas que cumprían os requisitos e presentaron correctamente a solicitude están a recibir o seu bono dixital, sendo o prazo de resolución dos expedientes de menos de 3 semanas. O obxectivo do Goberno con este programa é dixitalizar un millón de pemes para 2025.
Fonte: Expansión