Isto é o que conseguiu a empresa de innovación educativa “Teamlabs”, que creou unha carreira expresamente destinada ao emprendemento, co obxectivo de formar aos mozos nesta materia e que aprendan a desenvolver ideas e proxectos reais de negocio en equipo.
Esta pioneira titulación universitaria oficial en Emprendemento ofrece aos mozos a oportunidade de formarse en modernos espazos (“impact hub”) de aprendizaxe continua en Madrid e Barcelona, acudir a algunhas clases na Universidade de Mondragón (Guipúzcoa) e viaxar a cidades como San Francisco, China, India, Finlandia ou Brasil.
Tal e como destacou Jordi García, profesor asociado da Universidade de Barcelona e titor dun dos cursos, “o obxectivo é incentivar a poñer en marcha calquera iniciativa emprendedora que teñan os alumnos de grao”. Os estudantes, a través de clases semipresenciais, recibirán información, recomendacións e exemplos para ter “máis ferramentas á hora de emprender”, sinalou.
“Os rapaces apúntanse máis que as rapazas a este tipo de grao e a maioría dos proxectos xiran arredor de Internet, aínda que non faltan outros máis sinxelos e cos que tamén se factura diñeiro como é a organización dunha festa”, engadiu outro dos implicados.
Pola súa banda, o emprendemento na escola tampouco pasa desapercibido. A propia reforma educativa incluíuno na súa axenda como un tema a traballar dentro de todas as materias, especialmente en Secundaria. De feito, a Comisión de Educación do Congreso aprobou recentemente unha proposición non de lei para instar ao Goberno a fomentar o emprendemento en todos os plans de estudo dende a Primaria.
(Fonte: Innovaspain)