A Asociación de Parques Científicos e Tecnolóxicos de España (APTE) e a súa iniciativa Ciencia e Tecnoloxía en Feminino, na que Tecnópole participou activamente, déronse cita no maior evento de talento feminino en ciencia e tecnoloxía para promover as vocacións STEM e aproximar o labor dos parques aos máis novos.
Este grande evento bautizado como Talent Woman foi organizado por primeira vez en España, concretamente na cidade de Málaga, da man de FYCMA (Pazo de Feiras e Congresos de Málaga) e Talent Network, e conseguiu reunir máis de 6000 asistentes.
APTE e Ciencia e Tecnoloxía en Feminino participaron como convidados especiais a través de tres actividades: a exposición “Mulleres que cambiaron o mundo”, tres speaker corners e a mesa redonda “A promoción das vocacións tecnolóxicas nos parques científicos e tecnolóxicos”.
Exposición e speaker corners
A exposición “Mulleres que cambiaron o mundo”, situada no espazo Talent Girl, realizou un percorrido pola historia de 15 grandes mulleres do mundo da ciencia e a tecnoloxía como Marie Curie, Hedi Lamarr, Hipatia ou Ada Lovelace. Numerosas rapazas e rapaces puideron coñecer estas grandes mulleres e conseguir, ademais, a guía ilustrada do proxecto: “¿ Que quero ser de maior? ” na que se mostran exemplos de saídas profesionais de estudos STEM.
APTE tamén contou con tres speakers corners nos que representantes de 18 parques científicos e tecnolóxicos, xunto con investigadoras e empresarias, puideron interactuar cos grupos de alumnos para aproximarlles as actividades desenvolvidas polos parques en materia de promoción de vocación STEM, e tamén para animalos a decantarse por unha profesión de ciencia ou tecnoloxía.
Mesa redonda
O tema central da mesa redonda organizada pola Asociación xirou ao redor da promoción das vocacións tecnolóxicas nos parques científicos e tecnolóxicos, e a contribución que estes realizan para reducir a brecha de xénero nas STEM.
Para iso, comentouse a iniciativa Ciencia e Tecnoloxía en feminino e os seus primeiros resultados, entre os que cabe destacar que o 6,5% das rapazas que participaron nas xornadas organizadas polos parques participantes nesta iniciativa cambiaron de opinión con respecto aos seus estudos futuros e agora ven as STEM como unha mellor opción.
Ademais, os parques científicos e tecnolóxicos que colaboraron na iniciativa explicaron como se desenvolveron as distintas actividades nos seus recintos, necesidade de seguir organizando este tipo de actuacións e explicaron as numerosas actividades de promoción e divulgación dos estudos STEM dende hai máis dunha década.
Así mesmo, investigadoras e empresarias do ámbito dos parques expuxéronnos o seu punto de vista na promoción das vocacións STEM no ámbito feminino, destacando a importancia de visibilizar máis os estudos tecnolóxicos entre o público novo feminino para que poidan consideralo á hora de elixir o seu futuro profesional. Neste sentido sinalouse “a importancia do labor de divulgación para visibilizar estas profesións tecnolóxicas” entre as rapazas para que saiban que existen”.
Premios
A actividade finalizou coa entrega do premio do concurso “Propostas innovadoras a retos de Europa 2020”, que foi parar ao grupo de alumnos do IES Zaidín Vergeles en colaboración co PTS Granada pola proposta “WELY, Asistente de voz para a terceira idade”. Os gañadores recibiron uns lentes de realidade aumentada e un exemplar do libro “Mulleres na ciencia: 50 intrépidas pioneiras que cambiaron o mundo”. Así mesmo, recibiron unha placa conmemorativa para que poidan expoñela no seu instituto.
En segunda posición, recoñeceuse o IES Carreño Miranda en colaboración ao PCT Avilés, pola súa proposta para evitar a contaminación de plásticos nas praias. A terceira posición recaeu no Colexio Carmelitas Sagrado Corazón en colaboración co Parque Tecnolóxico de Álava, pola súa proposta “Domos”.