En agricultura, o uso de plásticos acolchados convencionais, obtidos a partir de derivados do petróleo, representa unha forma efectiva, aínda que pouco sustentable, de mellorar o rendemento dos cultivos en todo o mundo. Non obstante, tal e como apuntou a investigadora Chelo González, “a súa retirada adoita ser custosa e encarece o proceso produtivo, polo que, tras o seu uso, habitualmente son abandonados no chan, exercendo un impacto negativo tanto sobre este como en canto ao medio”.
Ademais, engadiu González, estes produtos “non poden ser reciclados debido aos elevados niveis de contaminantes que conteñen”. De aí que unha posible solución sexa “a súa queima in situ xera un serie de contaminantes aéreos prexudiciais, como poden ser as dioxinas”.
Non obstante, coa utilización de plásticos acolchados obtidos a partir de materiais de orixe natural, e que ademais sexan biodegradables, moitos destes inconvenientes poderíanse evitar. Neste sentido, González resaltou que estes bioplásticos “poderían deixarse sobre o chan sen risco de contaminar o medio e evitando deste modo os custos adicionais da súa retirada”.
Valor engadido
Actualmente, o número de plásticos agrícolas biodegradables de orixe natural no mercado é moi limitado, e segundo explicou Chelo González, “os seus prezos son de 2 a 3 veces superiores aos dos plásticos convencionais. Por iso, existe a necesidade de buscar alternativas sustentables, tanto dende o punto de vista ambiental como económico”.
Trátase de produtos que se comercializarían a un maior prezo. Non obstante, este encarecemento compensaríase co valor engadido que suporía a incorporación de compoñentes activos como antimicrobianos, antifúnxicos ou fertilizantes. Así, estes compoñentes activos serían liberados ao medio de forma controlada e evitarían tratamentos posteriores sobre os cultivos, e o seu conseguinte custo.
Os bioplásticos activos, concluíu González, “poderían redefinir as prácticas agrícolas e o sistema alimentario, ofrecendo un novo modelo de agricultura sustentable, non só mediante a substitución dos plásticos tradicionais senón como un novo enfoque para os tratamentos en campo”.
(Fonte: Innovaspain)