O Clúster Tecnolóxico Empresarial das Ciencias da Vida de Galicia (Bioga), con apoio da Axencia Galega de Innovación (Gain), entregou a semana pasada en Santiago de Compostela, no marco do BioDay, os VII Premios Bioga a Mestrelab como Empresa Biotech Máis Competitiva 2019, a SunRock Biopharma como Empresa Biotech Máis Innovadora 2019 e a TraffikGene como Mellor Idea Empresarial Biotech 2019.
Estes galardóns do sector bio pretenden incentivar o talento de Galicia e dos investigadores galegos, impulsar o desenvolvemento das iniciativas empresariais e, ao mesmo tempo, recoñecer e poñer en valor o traballo das empresas máis competitivas e innovadoras.
Bioga convocou este ano a todo o sector biotech no Hotel AC Palacio do Carmen. E fíxoo no BioDay O mellor camiño en Biotecnoloxía, unha xornada organizada e impulsada pola Axencia Galega de Innovación que serviu para que todos os actores da cadea de valor do sector biotech, encabezados polo conselleiro de Economía, Emprego e Industria, Francisco Conde, fixesen balance da Estratexia de Impulso á Biotecnoloxía de Galicia 2016-2020.
Nos VII Premios Bioga, únicos premios autonómicos de recoñecemento á consolidación empresarial, talento e innovación, hai tres modalidades. Este ano súmase o Premio á Empresa Bio Máis Innovadora aos xa existentes: Bio Máis Competitiva e Mellor Idea.
Premiados
O xurado elixiu como a Empresa Biotech Máis Competitiva 2019 a Mestrelab Research, compañía que desenvolve software científico desde Santiago. A firma, segundo o xurado, conta cunha “longa traxectoria profesional con significativas cifras de facturación e beneficios”. Ao mesmo tempo, para premiala, tamén foi valorada a “penetración dos seus produtos no mercado e a expansión internacional”. Hoxe está presente en máis de 100 países. Mestrelab Research conta cunha “sólida e prestixiosa carteira de clientes” e destaca polo investimento en I+D+i e pola súa “capacidade xeradora de emprego de alto valor”. Recolleu o galardón Carlos Cobas, CEO da compañía, que agradeceu o premio e destacou a implicación dos seus traballadores. “A nosa empresa segue crecendo ano tras ano”, apuntou.
SunRock Biopharma, situada no Cimus de Santiago de Compostela e que traballa no desenvolvemento e comercialización de anticorpos terapéuticos para combater patoloxías tumorais invasivas de difícil tratamento, logrou o galardón de Empresa Biotech Máis Innovadora 2019. ¿Por que foi a elixida? O xurado valorou “os seus produtos e servizos altamente innovadores, o gran potencial e alcance dos seus produtos e a súa boa estratexia empresarial así como a captación de recursos”. Bioga cre que a compañía, co seu forte crecemento, axudará a fortalecer o sector biotech galego. Recolleron o premio Juan Buela, xerente da compañía; e Pablo Garrido, director científico. Ambos deron as grazas ao unísono por ter elixido o seu proxecto. “Ser innovador non é fácil; é unha responsabilidade”, aseguraron. E fixeron un prognóstico: “A solución a calquera tipo de cáncer chegará a través dunha empresa como a nosa”. Dixérono para poñer en valor a aposta pola innovación que manifestan todos os actores que forman parte do ecosistema galego.
Pola súa parte, TraffikGene, iniciativa liderada polo investigador do CIQUS Javier Montenegro e que desenvolve novas formas de atravesar a membrana celular de forma selectiva para tratar enfermidades, mereceu o premio á Mellor Idea Empresarial Biotech 2019 en Galicia por contar con “un equipo promotor altamente capacitado e cualificado, con gran potencial” que desenvolve “unha idea de negocio innovadora, versátil e robusta”. Tamén foron valorados os “casos de éxito do grupo de investigación” que representa esta iniciativa e a súa capacidade e “potencial para captar financiamento para investigación”. O investigador do CIQUS recolleu o galardón e deu as grazas. “Os outros proxectos que presentaron a súa candidatura a este premio fai que sexa un honor recibilo”, manifestou ante os asistentes. E agradeceu a implicación de todos os protagonistas que fan posible TraffikGene. Tamén tivo un especial recoñecemento para Susana Torrente, técnica superior de Xestión da Área de Valorización, Transferencia e Emprendemento da USC. “Ela é fundamental para que os nosos proxectos cheguen a bo porto”.
O xurado que elixiu as firmas premiadas estaba formado polos membros da xunta directiva de Bioga, un representante da USC, un representante das Fundacións Biomédicas, un representante da Axencia Galega da Innovación e os ganadores da edición anterior (as compañías Nanoimmunotech e Phycosem Marine Agronomy).
(Fonte: Galiciaé)