A Consellería de Economía, Emprego e Industria abriu unha das liñas do programa de instrumentos financeiros innovadores (IFI) coa que destina 3,17 millóns de euros para axudas en forma de créditos de entre 50.000 e 500.000 euros con condicións “vantaxosas” para proxectos de I+D+i de pequenas e medianas empresas (pemes).
O prazo de presentación de solicitudes estará aberto ata o 30 de decembro ou ata que se esgote o orzamento. Os préstamos IFI Innova puxéronse en marcha en 2017 e deron apoio ata agora a dezanove proxectos, que recibiron préstamos por valor duns 3,6 millóns de euros, cos que se mobilizan investimentos de máis de 5,4 millóns.
Ámbito de aplicación
Os proxectos apoiados desenvólvense nos ámbitos das tecnoloxías da información e a comunicación (TIC), a ciberseguridade, as telecomunicacións ou os videoxogos, a automoción, a biotecnoloxía, a ecoinnovación, o sector forestal e os novos materiais.
Os préstamos concédense con interese reducido (euribor a un ano +0,10%), cunha porcentaxe de financiamento do 70 por cento a través do préstamo e un 30 por cento de fondos propios ou financiamento bancario. Non se requiren garantías ata os 200.000 euros e o prazo de amortización é de entre dous e 12 anos, con ata catro anos de carencia.
Con estes fondos pódense financiar gastos de persoal vencellado aos proxectos, custos de bens de equipo, instalacións técnicas, equipos para procesos de información ou datos, software, moldes e materiais para o desenvolvemento do proxecto e custos de investigación contractual, coñecementos técnicos ou patentes adquiridas.
Fonte: El Ideal Gallego