Non obstante, a produción de láminas de grafeno presenta algunhas dificultades, dadas as características nanométricas do material. Por iso Graphenea, empresa baseada en CIC nanoGUNE e unha das poucas firmas en todo o mundo que se dedica á fabricación deste material, acudiu a IK4-TEKNIKER para traballar no deseño dun proceso de produción máis automatizado, estandarizable, escalable e fiable.
As láminas de grafeno adoitan producirse por medio dunha tecnoloxía chamado CVD, é dicir, deposición química a partir da fase de vapor. O grafeno deposítase sobre unha placa de cobre cando se disipa o vapor no que se transporta. Un dos problemas que estaba a experimentar a compañía era que os procesos produción necesitaban de moita intervención manual.
Co obxectivo de solucionar estas dificultades, a unidade de deseño, fabricación e montaxe do centro tecnolóxico e Graphenea deseñaron conxuntamente un sistema para transferir o grafeno dunha lámina de cobre a unha lámina de silicio, un material clave na industria electrónica, por medio de diversos baños químicos que disolven o cobre e permiten depositar o produto sobre o silicio.
Manipulación máis sinxela
IK4-TEKNIKER deseñou un dos instrumentos básicos do novo proceso de Graphenea, un sistema ergonómico fabricado de teflón que permite manipular de xeito máis sinxelo o grafeno mentres recibe os diversos baños químicos para ser transferido ao silicio.
Segundo Rafa Enparantza, director da unidade de IK4-TEKNIKER que participa no proxecto, “trátase dun proxecto con gran repercusión nos procesos internos da compañía. No noso centro moitas veces traballamos con grandes proxectos europeos, pero en casos como este, cando traballamos directamente para un cliente que financia a I+D dun produto ou proceso, os resultados son de aplicación inmediata e resulta moi gratificante”, apunta.
O proxecto está nunha fase moi avanzada e os membros do equipo de Enparantza traballan xa no terceiro prototipo do sistema. As primeiras versións foron fabricadas por medio de impresoras 3D en materiais de traballo. Pero agora, estase a fabricar o terceiro prototipo en teflón, co obxectivo de proporcionar condicións reais ás probas de aplicación.
(Fonte: SINC)