A nova plataforma fai uso dun chip e unha clave que usarán todos os sistemas do coche para comunicarse entre eles e con Internet. Así, segundo os dous socios nesta aventura pola seguridade, afirman que será moi complicado intervir un coche conectado de forma remota ao blindar as comunicacións entre as aplicacións internas do coche e as do exterior.
A tecnoloxía que presentaron G&D e IBM na pasada edición do Salón de Frankfurt emprega unha combinación de hardware e software para almacenar no interior do vehículo (nunha zona antimanipulación) as claves criptográficas e a súa administración para poder xestionar as diferentes identidades e poder conceder acceso a usuarios autorizados ao vehículo.
Asociado a este hardware e software, as dúas compañías van engadir un sistema de seguridade intelixente, tanto interno como remoto, para monitorizar usos anormais do vehículo e mellorar a detección de ataques. Todos os coches equipados con este sistema terán un módulo de xestión de subscricións para as tarxetas SIM para poder enviar os datos con seguridade.
Non é tan pronto para que falemos do coche conectado xa que fabricantes e asociacións comezan a poñer data ao primeiro ano sen accidentes mortais nos coches que se comercialicen a partir de 2020. E para conseguir este obxectivo temos que basearnos en que os coches falen entre eles para que a futura condución autónoma teña unha base decente sobre a que cimentar as súas promesas. Aínda non temos a data de implantación desta tecnoloxía nos primeiros vehículos de proba, pero todo apunta a que en poucos anos saberemos máis deste tipo de tecnoloxía.
(Fonte: Agencias)