A candidatura galega de proxectos aspirantes a captar fondos europeos para a recuperación integra catro iniciativas centradas en dar unha lombeirada e modernizar a industria forestal cun investimento total de 41,4 millóns de euros. Destes recursos, algo máis de 70 cada 100 euros -29,4 millóns- destinaríanse a un plan de axudas para potenciar o uso de madeira local na construción. Trataríase de subvencións para familias e empresas que aposten por este material en edificacións e infraestruturas en contornas urbanas e rurais e na esfera industrial. Ademais, asinaríanse convenios para empregar esta materia prima natural tamén en obras públicas.
A madeira de eucalipto, piñeiro ou castiñeiro é óptima para utilizar como elemento estrutural en vivendas ou locais comerciais pola súa resistencia. Máis aló de potenciar a actividade da industria forestal, a aposta por este material na construción pode aumentar o rendemento económico das plantacións no medio rural galego e contribuír ao coidado do medio ambiente coa utilización dun produto de quilómetro cero, renovable e fixador de carbono como a madeira. Galicia pide con cargo ao programa Next Generation 23,5 millóns para sufragar ese plan de axudas e a idea da Xunta é sumar outros 5,9 millóns ao investimento.Outro dos proxectos ligados ao sector forestal que o Goberno autonómico postulou ante o Executivo central para absorber fondos europeos para a recuperación é a posta en marcha dunha planta piloto de novos materiais derivados da madeira. A iniciativa consiste en crear unha unidade de investigación para desenvolver materiais sustentables enfocados á «industria estratéxica máis afectada pola pandemia», como o téxtil, automoción, aeronáutica, naval, arquitectura ou mobiliario. Para esta medida solicitáronse 4 millóns do fondo da UE.
É a mesma contía que se inxectaría en cada un dos outros dous proxectos da vicepresidencia segunda e Consellería de Economía propostos para a industria forestal. Un deles consiste en despregar un plan de axudas dirixido a empresas do sector para desenvolver proxectos no ámbito do ecodeseño, a economía circular e a ecoinnovación «que exerzan un efecto tractor noutros sectores cara a transición ecolóxica». Os apoios enfocaríanse cara á industria de segunda transformación (mobles ou contract). A última iniciativa postulada pasa por ofrecer axudas para impulsar a dixitalización no sector, especialmente entre as pemes, con novos modelos de negocio e servizos tecnolóxicos e a xeración de cadeas de valor.
Fonte: El Progreso