Galicia alíase con Portugal para captar fondos en I+D+i

Galicia e o norte de Portugal subscribiron unha alianza para captar fondos do programa europeo de I+D+i Horizonte 2020. Este acordo materializarase na primeira estratexia de especialización intelixente conxunta da Unión Europea entre dúas rexións fronteirizas, un documento no que plasmarán, tal e como xa o fixo Galicia, cales son as súas prioridades en investigación e desenvolvemento e nas que se definen aquelas áreas nas que poden asumir o liderado. En xogo está un financiamento de 10.000 millóns de euros para proxectos de I+D+i, que son os que reserva a UE para as rexións que cooperen neste ámbito.

A alianza foi avanzada polo conselleiro de Industria, Francisco Conde, quen destacou que “o establecemento da RIS3 galaico-portuguesa permitirá que o Norte de Portugal e Galicia opten con moita máis forza aos fondos comunitarios, o que multiplicará a nosa capacidade de investimento, xa impulsada no caso de Galicia polos 1600 millóns de euros que mobilizará a nosa propia estratexia”.

Na elaboración da estratexia, que deberá estar lista no primeiro semestre do próximo ano, participarán axentes dos sistemas de innovación de ambos os dous territorios. A valorización dos recursos do mar para obter novos biocombustibles; a modernización do sector agrícola; o desenvolvemento de tecnoloxías para aproveitar a enerxía das ondas; o impulso a industrias estratéxicas como a téxtil a través do impulso de novos materiais ou a nanotecnoloxía son algunhas das áreas de acción conxunta das dúas rexións.

(Fonte: La Voz de Galicia)