O informe, presentado no Foro de Innovación Sustentable de 2015, organizado xunto á COP21 en París, sinala que o número de invencións en tecnoloxías de mitigación do cambio climático (CCMTs) en todo o mundo aumentou de xeito constante dende que se asinou o Protocolo de Kioto en 1997.
“Necesitamos con urxencia novas tecnoloxías para facer fronte ao desafío global do cambio climático”, explicou Benoît Battistelli, presidente da OEP. “O informe mostra que en combinación coa lexislación e as políticas para promover tecnoloxías de mitigación do cambio climático, o sistema de patentes pode apoiar a investigación, o desenvolvemento e a innovación neste campo, así como impulsar os fluxos comerciais e de investimento, e a transferencia destas novas tecnoloxías a outras rexións”, engadiu.
O crecemento das invencións de baixa emisión de carbono -que se realizan nos sectores das enerxías renovables e o transporte, seguidos da construción- foi moito máis rápido que noutras tecnoloxías. Hoxe representan case o 6% do total das invencións do mundo, por enriba do 2% en 1995.
Como resultado, a intensidade de carbono do PIB en Europa caeu un 30% nas últimas décadas, o que significa que o CO2 (en kg) por euro do PIB europeo reduciuse nun terzo dende 1995, e foi o máis baixo no mundo desenvolvido dende o ano 2000.
Europa, líder mundial en tecnoloxías verdes
Europa atópase entre os líderes globais en avances técnicos cara a unha economía baixa en carbono. A rexión produce preto dunha quinta parte de todas as invencións de baixo carbono no mundo. En canto a invencións “de alto valor” (aquelas con maior potencial económico, para o que se solicita a protección de patentes en máis dun país), as europeas representan case dúas quintas partes.
A maioría das invencións CCMT en Europa e tamén en todo o mundo realízanse nos sectores da enerxía renovable e o transporte, seguidos da construción. Ao comparar estas invencións con outras en todos os outros ámbitos da tecnoloxía, Europa volveuse cada vez máis especializada dende 1995, e agora é unha das rexións máis avanzadas do mundo en tecnoloxías de baixa emisión de carbono.
Os países europeos son tamén fortes no comercio de mercadorías de baixo carbono. Son o maior importador e o segundo maior exportador de produtos CCMT. Do mesmo modo, a rexión actúa como unha fonte importante de investimento estranxeiro directo nestas invencións, cun investimento que abrangue todos os continentes. O estudo mostra que as solicitudes de patentes transfronteirizas van da man co comercio e o investimento estranxeiro en CCMTs, que fomenta a transferencia de tecnoloxía internacional.
Segundo o traballo, seis países representan máis do 80% de todas as invencións europeas en tecnoloxías sustentables. Alemaña lidera con diferenza, con case a metade das invencións en tecnoloxías de mitigación do cambio climático de Europa, seguida de Francia, o Reino Unido, Italia, Suecia e España.
(Fonte: SINC)