Co obxectivo de traer a innovación ao sector agroalimentario galego naceu hai xa algúns anos o Business Factory Food, a aceleradora do sector alimentario de Galicia impulsada pola Xunta e dinamizada polo Clúster Alimentario de Galicia (Clusaga). Agora, este programa deu un paso máis e pon en marcha unha sección de consolidación, que xa elixiu aos seis primeiros proxectos. Estes poderán acceder a un programa de apoio integral e especializado de doce meses de duración. Entre eles hai empresas que queren desenvolver novos produtos alimentarios a partir de excedentes e residuos e outras que facilitan a venda de diferentes produtos en China.
27 propostas
Un total de 27 propostas, todas elas con selo galego, presentáronse a este primeiro programa de consolidación. Delas, o xurado destacou a súa aposta pola innovación e a tecnoloxía para facer fronte aos retos da industria alimentaria nas áreas de dixitalización e automatización, sustentabilidade, desenvolvemento de novos produtos e interacción con clientes e consumidores. Tamén, a súa aposta por fortalecer a resiliencia do sector a situacións de emerxencias derivadas de pandemias como a do coronavirus.
Os seis proxectos elixidos recibirán todo o asesoramento que precisen durante os vindeiros doce meses, así como financiamento a través dun préstamo participativo por parte de Xesgalicia que podería levar unha opción de capitalización de ata un máximo de 250.000 euros.
Fonte: La Voz de Galicia