Coa concesión desta axuda -que representa o 40% do custo do proxecto, o que supón que Egatel ten que mobilizar para o seu desenvolvemento máis de dous millóns de euros adicionais-, a compañía ourensá quere sacar adiante un total de catro iniciativas de investigación estratéxicas, nas que colabora con outras empresas, algunhas delas da comunidade galega.
Os proxectos, nos que a empresa xa comezou a traballar, céntranse na comunicación por satélite en mobilidade, así como na mellora dos sistemas de salvamento marítimo. Á convocatoria na que Egatel quedou terceira concorreron 295 solicitudes nas que tiñan participación 762 empresas distintas. Iso si, máis de medio centenar xa nin sequera foron avaliadas ao non pasar a primeira selección.
Trátase dun concurso centrado nos proxectos de desenvolvemento experimental dirixido a nove comunidades autónomas españolas, entre as que se atopaba Galicia, dende onde se lideraban 103 proxectos valorados en 160 millóns de euros, e logrouse financiamento por valor de 14. As condicións para a concesión de subvencións establecían que os beneficiarios debían ser consorcios formados por entre dúas e seis empresas. A duración do proxecto é de dous a tres anos naturais e só se admitían aquelas propostas que contemplasen iniciativas cun presuposto de entre un e catro millóns de euros.
Un modem premiado
Dáse a circunstancia de que esta non é a única boa noticia que recibiu nos últimos meses a firma ourensá, situada na Tecnópole de San Cibrao das Viñas e que o ano que vén cumpre 25 anos. Un dispositivo receptor e transmisor de datos vía satélite de última xeración fabricado alí foi premiado como o produto máis innovador polas empresas galegas de tecnoloxías da información. O xurado valorou a súa maior eficiencia e menor custo respecto a outros dispositivos similares. Ademais, destacou o amplo espectro de servizos que ofrece o terminal satélite, denominado Smart LNB, que van dende o mercado de consumo ata aplicacións profesionais e industriais.
Ademais, a empresa, a través do seu distribuidor en Chile, a empresa Sercom, coa que levou a cabo outros proxectos en media potencia, foi adxudicataria da subministración, instalación e posta en marcha dun transmisor ISDB de 6,5KW para TVR-Televisión Rexional de Chile (CNC Medios) en Santiago de Chile.
O transmisor de refrixeración líquida, modelo TLWH7808, destaca polo uso da tecnoloxía Doherty banda ancha que permite obter a máxima eficiencia enerxética e resintonizar a súa frecuencia de operación sen necesidade de ningún cambio ou actuación HW sobre o equipo.
Para garantir a mellor calidade do servizo sobre a capital do país no lanzamento desta nova canle, optouse por un transmisor en configuración de máxima redundancia, incluíndo dobre excitador con unidade de control automática/manual, proteccións eléctricas individuais por módulo, un intercambiador de calor con dous ventiladores de alta eficiencia e unha unidade de bomba que contén dúas bombas en modo de espera activo.
“Dende Egatel queremos destacar a versatilidade desta serie de transmisores na que se optimizou tanto a eficiencia enerxética como a calidade de emisión (MER), co fin de obter a mellor calidade na área de cobertura e minimizar os custos operativos dos nosos clientes,” explica José M. Mariño, director de Vendas e Mercadotecnia da empresa.
(Fonte: Egatel)