Aimen colidera o deseño dun sistema robotizado láser para reparar grandes compoñentes

Un consorcio galego está a desenvolver un novo sistema robotizado láser que terá como obxecto a reparación e fabricación aditiva mediante láser de compoñentes de grandes dimensións, que irán destinados aos sectores aeronáutico, automoción, metalmecánico e naval, entre outros. Trátase do proxecto Fado que conta cun presuposto de 1,5 millóns de euros e é desenvolvido por un consorcio liderado pola empresa CT Enxeñeiros e Aimen e participado polas galegas Hydracorte, Syspro e Unimate Robótica, a andaluza Airgrup, así como a Universidade de A Coruña.

Co novo sistema, que combinará a achega láser de fío e po nun dispositivo cun cabezal híbrido, preténdese mellorar a calidade do produto, incrementar a eficiencia do material final empregado en máis dun 30%, aforrar a cantidade de material, diminuír os residuos xerados, mellorar a produtividade e a velocidade do proceso, e reducir os custos e aumentar a rendibilidade.

En canto ás súas aplicacións, Aimen asegura que na industria aeronáutica se poderá utilizar para fabricar pezas de gran tamaño en aliaxes lixeiras; na automoción e o metalmecánico para producir compoñentes estruturais de grandes dimensións; e na industria enerxética, petroquímica e naval para crear pezas de alto valor engadido.

Segundo Aimen, o proxecto supón un “salto tecnolóxico”, así como un “desafío”, ao buscar “solucionar as deficiencias” actuais da fabricación aditiva por láser en pezas de grandes dimensións para así “explotar este sistema en máis produtos e dun modo máis rápido e efectivo”.

(Fonte: Faro de Vigo)