A fábrica intelixente do sector do motor non é algo do futuro. Xa está aquí, en Vigo. O Proxecto Factoría 4.0 de Automoción, liderado por PSA-Vigo e coa colaboración do CTAG, conclúe este ano tras a incorporación dun regueiro de novas tecnoloxías e procesos que están en marcha nos talleres da factoría de Balaídos. Desde o seu inicio en 2016, o proxecto mobilizou investimentos por valor de 139 millóns de euros, dos 145 millóns previstos. Con esta “panca”, como o definiu o director da planta, Ignacio Bueno, o sector da automoción na comunidade xerou nestes catro anos uns 4.500 empregos, ademais de aumentar as vendas en 1.300 millóns de euros.
A iniciativa, cofinanciada cunha liña de axudas da Axencia Galega de Innovación (GAIN) da Xunta, supón un avance en “calidade, fiabilidade, custos, seguridade, ergonomía e medio ambiente”. Para iso, a factoría enfrontouse a tres desafíos, que segundo o responsable de Innovación de Procesos da fábrica, Juan Areal, concentráronse nunha “redución drástica do prazo de entrega” dos vehículos, seguindo pola “capacidade de resolver o que o cliente quere” e contar cun “sistema de produción ultra-áxil”.
Segundo Areal, PSA-Vigo quere unha “fábrica virtual, ecoamigable, áxil, flexible e conectada”, con coidado en temas como a “ergononomía de postos ao mellor nivel” ou o dispor dunha planta “neutra en enerxía e refugallos”. Así, os principais avances leváronse a cabo en embutición, ferraxe, montaxe, pintura, calidade e loxística.
Con aplicación xa en planta, abranguen campos como a robótica (como no control de punzonados por cámara en tempo real na parte de embutición), a visión artificial (para apoiar o abastecemento e a supervisión dixital do estado da carrozaría, entre outros), o uso do 3D (para garantir os controis nas zonas de calidade e pintura) ou os transportes automatizados na planta (con vehículos sen condutor guiados con banda magnética).
Moitos dos sistemas foron desenvoltos en colaboración co CTAG, cuxo director de Procesos e Materiais, Antonio Mateos, remarcou que a súa implantación require dunha análise previa sobre o mantemento ou a dedicación que precisarán. Posteriormente, concretou, estúdanse as tecnoloxías que deben aplicarse “para mellorar un proceso ou implantar un novo”, “o estado de madurez” das dispoñibles e os requirimentos para a súa implantación. “Cobre moitos aspectos do negocio para facer desta fábrica unha das mellores do sector da automoción”, indicou Bueno, que lembrou que só este ano ”lanzáronse 37 actuacións novas por 8 millóns de euros” nos procesos de fabricación.
Ademais, está a investigarse na motorización con hidróxeno. “Estamos a dotar laboratorios para traballar niso”, apuntou Mateos sobre a “a liña de traballo” xa en marcha no centro, cuxas “probas e ensaios” comezarán o vindeiro ano.
Fonte: Faro de Vigo