Wuhan, xaneiro de 2020. Un dron planea sobre as rúas equipado con cámaras de detección de temperatura e micrófonos. Localiza persoas que andan pola rúa e lémbralles a obrigación de permanecer na casa. Ao mesmo tempo, en toda China iníciase unha operación de limpeza na que centos de drons desinfectan lugares públicos con axuda dun equipamento de pulverización. Máis tarde, en España, os avións non tripulados da DXT controlan desde o aire o cumprimento do estado de alarma e os peches perimetrais.
Isto ocorreu en plena pandemia. Distintos puntos do mapa, distintas aplicacións, pero, en todo caso, solucións tecnolóxicas que converteron a aviación non tripulada no sector que máis medrou durante o ano longo transcorrido de crise sanitaria en todo o mundo, e tamén en Galicia.
Hai demanda
No caso da comunidade galega, o tirón da iniciativa público-privada representada polo CIAR (Centro de Investigación Aeroportada de Rozas), impulsado pola Xunta e os seus socios Indra Babcock e Boeing, tivo un efecto chamada na iniciativa emprendedora. Cando arrincou esta aposta industrial da Xunta, no ano 2015, este incipiente sector galego apenas contaba con 15 operadores. Ao peche do ano 2019, a cifra de empresas superaba xa as 200. Pero o maior crecemento rexistrouse durante o ano pasado, xa que a 31 de decembro de 2020 Galicia pasou a sumar un total de 338 operadores autorizados por AESA, a Axencia Estatal de Seguridade Aérea (na Coruña, 139; en Pontevedra, 125; en Lugo, 25 e 31 en Ourense).
En España, a cifra de compañías supera xa as 4500, segundo a axencia que, á vez que acredita aos novos operadores, ocúpase de controlar que a súa actividade se axusta á nova normativa, en vigor desde decembro do 2020.
Os operadores galegos de drons actualmente centran a súa actividade en misións relacionadas coa fotografía, a topografía e a filmación aérea (ocupan o 40% dos traballos desenvoltos). A observación e a vixilancia levan o 13,28% do mercado profesional, seguidas das tarefas de investigación e desenvolvemento (11,57%), as de emerxencia e salvamento (10,11%) e as de investigación e recoñecemento instrumental (8%).
Di a Xunta que o investimento asociado a Rozas (150 millóns até o 2020) «xa é unha realidade que está a dar resultados concretos». Xera 260 empregos de alta cualificación, 20 proxectos de I+D desenvoltos polas empresas motoras (Indra, Babcock e Boeing) e a participación neles de 30 compañías e centros de coñecemento.
Un negocio de 1.200 millóns de euros en 2035
A industria dos aparellos aéreos non tripulados está en crecente desenvolvemento e as estimacións do Goberno pasan por que España conte en 2035 con 51.400 drons que xerarán un volume de negocio de 1.200 millóns de euros. Segundo os datos manexados pola Comisión Europea, agárdase que até o 2035 o sector do manexo de vehículos aéreos non tripulados e as actividades relacionadas con eles xeren 100.000 postos de traballo directos e indirectos.
Fonte: La Voz de Galicia